ମୋ ଜନ୍ମଭୂମି - ଅଶୋକ କୁମାର ପ୍ରଧାନ , ଢେଙ୍କାନାଳ

  :: ମୋ ଜନ୍ମଭୂମି ::
=========                                      

ଘନ ତମସାର ବୁକୁ ଚିରି ଦିନେ
                             କାନ୍ଦିଥିଲି କୁଆଁ କୁଆଁ,
ଜନନୀ ଜଠରୁ ଜନ୍ମଭୂମି ପରେ
                             ଜଳି ଥିଲା ଷଠୀ ନିଆଁ lll

ତା କୋଳରେ କେତେ ନାଚି କୁଦି ବୁଲି
                            ଖେଳିଛି ଆନନ୍ଦ ମନେ,
ମାଆ ପରା ସିଏ ସବୁ ସହି ବହି
                            ପର କରିନାହିଁ ଦିନେ lll

ଆହାର ବିହାର ନିବାସ ନିଳୟ
                            ତାହାରି ଦୟାର ଦାନ,
କେତେ ଯେ ଦେଇଛି ହିସାବ ରଖିନି
                           ତା ଦାନେ ହୋଇ ମହାନ lll

ଶାଗୁଆ କ୍ଷେତର ସମ୍ଭାର ସୃଜି
                          ଦିଏ ସର୍ବ ମୁଖେ ଅନ୍ନ,
ସମୀରଣେ ଅଙ୍ଗ ପରିତୋଷ ହୁଏ
                          ବାସ୍ନା ବିମୋହିତ ମନ lll

ପ୍ରତିଦାନେ କେବେ ମାଗେ ନାହିଁ ମୂଲ
                         ଦେଇ ଅମାପ ଦାନର
ଜନମ ମାଟି ମହାନ ମୋ ପାଇଁ
                         ହୃଦରେ କାଟିଛି ଗାର lll

କୋଟି ଜନମର କଳୁଷ କାଳିମା
                         ଏ ଜନମେ ହେଉ ଦୂର,
ପୁରି ଉଠୁ ତାର ବକ୍ଷ ଗହ୍ଵରେ
                        ଶିର ତନୁ ମାଂସ ହାଡ lll

ଆଶୁ ଆପଦରେ ବଳୀଦାନ ଦେବି
                         ନ ପାତିବି କେବେ ମଥା,
ତା ଦେହର ଧୂଳି ମଥାରେ ବୋଳିଛି
                         କରି ମୁଁ ବିଜୟ ଟୀକା lll
 
======@======

ଅଶୋକ କୁମାର ପ୍ରଧାନ
ତର୍କାବେଡା, କଡଲା
ଜିଲ୍ଲା - ଢେଙ୍କାନାଳ
ମୋ - 9556666355
Email - ashok80pradhan@gmail.com